ميادة الناظر

 

“الرِّجَالُ قَوَّامُونَ عَلَى النِّسَاءِ بِمَا فَضَّلَ اللَّهُ بَعْضَهُمْ عَلَىٰ بَعْضٍ وَبِمَا أَنفَقُوا مِنْ أَمْوَالِهِمْ”

القوامة معناها كبير لمن يريد ان يقيم بيت ناجح ،زي ما في كتير من الافلام والمسلسلات اللي وضحت القوامة

في ابهي صورها ،مثلا في مسلسل” لن اعيش في جلباب ابي” المسلسل التسعيناتي اللي قصته مستوحاه عن رواية إحسان عبد القدوس، وبطولة الثنائي نور الشريف، وعبلة كامل، المسلسل في وقتها حقق نجاح كبير وكل ما يتعرض بيتابعه الجمهور بشغف زي اول مرة لحد الآن، ولكن مؤخرا بدأت السوشيال ميديا  تستخدم المسلسل كوميكس، بس الحقيقة ان المسلسل ده وقعي جدا ،ودخل البيوت بكل سهولة لانه اتكلم عن مشاكل بتواجههم رغم ان المسلسل بيدور عن قصة رجل أعمال بدأ من تحت الصفر، ولكن الملفت هو قصة الحب بين عبد الغفور وفاطمة، قصة حب واقعية جدا وتعتبر من أفضل قصص الحب اللي اتعملت في الدراما.

علاقة عبد الغفور و فاطمه اللي كلنا مبهورين بيها دي سبب وجودها ونجاحها هو الراجل .. هي جمالها كان عادي مش مهتمة بنفسها لاعملت بروتين او ريجيم و لا حتي بتحط أحمر ولا أخضر ، علشان هو عنده رضا وبيحبها و شايفها ملكة جمال مقلهاش خسي شويه ولا اتخني كل ما يشوفها يقولها انتى كل شويه تحلوى كده ليه بالرغم من شكلها المجهد جدا ..و. عصبيه و دماغها صغيره و نكديه و بتغير و بتغلط زى كل الستات بس هو بقي بيحتوي كل ده و بيهديها و يضحكها كمان عمره ماقلها انتي ايه لازمتك ده انتي قاعده ف البيت ولا انتى طول النهار بتعملى ايه بالعكس ديما بيقولها تسلم ايدك وتعبينك معانا واجمل اكل باكله فى البيت وانها سبب كل الخير اللي هو فيه ، علشان كده قال عليها شريكته في الحياه .

 


ورغم انها ادته ذهبها الا انه رجعه ليها أضعاف مضاعفه .
وكمان عمرها ما طلبت منه حاجه واخرها عليها حتى لو مش معاه بيوعدها انه هيجيبلها لما يبقى معاه وفعلا بيوفي بوعده ليها ودي نقطة مهمه جدا “الوفاء بالوعد
عبد الغفور هو اللي خلي العلاقه تطلع بالشكل الجميل ده مش فاطمه. فاطمه زي اي ست مصريه عاديه جدا
عبد الغفور هو اللى فهم القوامة صح فى انه هو محور وعامود المنزل.

اللي بيخلي طعم لاي علاقة هو التفاصيل اللي زي اللي اتقالت فوق مش مجرد كلام حلو او خروجة فالفلانتين لان الحب اكبر من كده بكتير

بس طبعا في المجتمع العربي بنفهم معني القوامة غلط انه تفضيل وتكريم من الله ليهم مش عارفين ان المقصود انهم لازم يشيلوا عن الستات الحمل لقدرتهم البدنية واختلافاتهم الجسدية والنفسية ودي شيلة تانية المفروض يشيلوها فوق شيلتهم الاساسية .